Li témpor-bicicle
Si li témpor-machine vell haver pedales, probabilmen it vell aspecter quam ti bellisim creatura quel arivat ante li Crist-Nascentie de 2022, por acompaniar me pluri mensus durante que Urganda atende patientmen li ariva del sole:
Sin frenes
Li mecanisme del frenes, tam old quam lu ceteri del bicicle, ne esset efectiv e havet provisori fren-sapates corcal.
Por ne pretercurrer pluri secules durante li frenage, lu convenent esset ne viagear rapidmen tra li témpor o, preferibil, absolutmen ne viagear, fórsan exceptet adsupra.
De corc a cautchuc
Un prim prov adaptar almen un par de old fren-sapates esset ínfructuosi. Li calibre del scruv del fren-sapate esset min quam li diametre besonat del tenetor in li bicicle, e nequel option de adjustation semblat fidibil.
Sin certitá ca li mesuras de tam old fren-sapate e fren-sapatiero esset sam quam tis de alquel modelle actual, yo comprat tri: du de classic bicicle e un por frenes Cantilever.
Li spessore del barre del fren-sapate Cantilever esset un poc minu quam ti del old fren-sapatiero, suficent por rejecter it quam prim option.
Li longore del scruv del fren-sapates de classic bicicle esset ínsuficent por li mecanisme de tenetion.
Li melior option por comensar esset extracter li fren-sapates cautchucal ex li plu rudimentari modelle e provar inserter les in li old fren-sapatieros. Li mesuras semblat tre simil.
Con frenes
Li fren-mecanisme es poc eficient, comparat con tis actual, e su pezzes es perusat e misadjustat sin solution.
Quar manus vell har fat un melior labor quam du, nam null maniere hayat por fixar bon li fren-sapatieros e in sam témpor tener les talmen que ili ne move se.
Finalmen, vi lu melior quel yo successat adjustar:
Malgré omno, li témpor-bicicle frena un poc melior con li fren-sapates de cautchuc quam con tis corcal. Mem talmen, lu prudent va esser ne viagear tre rapidmen ínter li secules e, lu max important, comensar frenar long témpore ante li prim vision del destination.